Добрая навіна для тых, у каго заканчваецца беларускі пашпарт: Польшча зноў падоўжыла спрошчаны парадак выдачы польскага праязнога дакумента для замежніка грамадзянам Беларусі, якія жывуць у Польшчы, — да 31 снежня 2026 года.
Распараджэнне міністра ўнутраных спраў і адміністрацыі Польшчы ад 16 чэрвеня 2026 года ўступіла ў сілу 1 ліпеня. Дзякуючы гэтаму схема, якая працуе з 1 ліпеня 2023 года, не перарывалася.
Папраўка. У навіне ад 2 ліпеня мы пісалі, што пра новае падаўжэнне пакуль не абвешчана. Гэта было недакладна: распараджэнне падпісалі 16 чэрвеня, а Упраўленне па справах замежнікаў паведаміла пра яго 23 чэрвеня. Просім прабачэння.
Чаму гэта важна
Пасольствы Беларусі не падаўжаюць пашпарты за мяжой, а для падаўжэння ВНЖ, працы і паездак патрэбны дзейны дакумент. Польскі праязны дакумент для замежніка вырашае гэтую праблему.
Куды падаваць
Заява падаецца асабіста ў ваяводскае ўпраўленне (urząd wojewódzki) па месцы жыхарства ў Польшчы. Пералік дакументаў і парадак запісу ўдакладняй на сайце свайго ваяводскага ўпраўлення.
Не адкладвай
Падаць заяву па спрошчанай працэдуры можна да 31 снежня 2026 года. Схему падаўжалі ўжо некалькі разоў, але гарантый новага падаўжэння няма — калі дакумент табе патрэбны, падавай загадзя: чэргі ў ваяводскіх упраўленнях бываюць доўгімі. Што рабіць, калі пашпарт заканчваецца, мы падрабязна разбіралі ў асобным гідзе.
Крыніцы: Упраўленне па справах замежнікаў Польшчы (mos.cudzoziemcy.gov.pl), KBZ Legal.