Страхоўка ў Чэхіі

Калі ты збіраешся жыць і вучыцца ў Чэхіі, то табе абавязкова трэба ведаць, якую страхоўку выбраць і як яе аформіць. Расказваем, што трэба ведаць.

Важная ўмова: ліміт 400 000 еўра

З 20 верасня 2023 года мінімальны ліміт страхавога пакрыцця на адзін страхавы выпадак для комплекснага камерцыйнага страхавання вырас да 400 000 еўра. Гэтае патрабаванне распаўсюджваецца на ўсе новыя дагаворы, неабходныя для легалізацыі. Калі ты афармляеш ці працягваеш ВНЖ у Чэхіі, то пераканайся, што ў тваім полісе прапісана менавіта гэтая сума.

Каму патрэбна камерцыйная страхоўка?

Калі табе больш за 18 гадоў і ты не працуеш афіцыйна па чэшскім працоўным дагаворы, то табе патрэбная менавіта комплексная камерцыйная страхоўка (KZPC). Гэта датычыцца:

• замежных студэнтаў без афіцыйнага працаўладкавання.
• прадпрымальнікаў і самазанятых.
• членаў сем’яў замежнікаў, якія не працуюць афіцыйна.
• усіх, хто жыве ў Чэхіі па ВНЖ, але не мае працоўнага дагавора.

Важна, што комплексная страхоўка павінна ўключаць не толькі экстранную дапамогу, але і прафілактычныя агляды, вакцынацыю, догляд пры цяжарнасці і родах, неадкладную стаматалогію. Поліс, які не пакрывае гэтыя паслугі, для легалізацыі не падыходзіць.

Хто прадастаўляе комплекснае страхаванне ў Чэхіі?

Многія правайдэры прапануюць страхоўкі ў адпаведнасці з патрабаваннямі Міністэрства ўнутраных спраў, у тым ліку:

• pVZP.
• Maxima.
• Slavia.
• Uniqa.
• AXA Assistance.

Дзяржаўнае страхаванне праз працаўладкаванне

Калі ты афіцыйна працуеш у Чэхіі па працоўным дагаворы (HPP), то асобная камерцыйная страхоўка табе не патрэбная. Ты аўтаматычна ўключаешся ў сістэму дзяржаўнага медыцынскага страхавання: 9% узносу плаціць працадаўца і 4,5% утрымліваецца з тваёй зарплаты. Парог для ўключэння ў сістэму: для дагавора аб працоўнай дзейнасці (DPČ) — даход ад 4 500 крон, для дагавора аб выкананні працы (DPP) — ад 10 000–12 000 крон у месяц.

Дзеці, падлеткі і абавязковая дзяржаўная страхоўка

Гэта важная рэформа, аб якой ведаюць не ўсе. З 1 студзеня 2024 года ўсе замежнікі маладзейшыя за 18 гадоў з дзеючым відам на жыхарства ў Чэхіі абавязаныя ўдзельнічаць у сістэме дзяржаўнага медыцынскага страхавання. Дзіця ўключаецца ў сістэму:

• з дня нараджэння, калі яго маці мае ВНЖ у Чэхіі.
• з дня атрымання ВНЖ, калі яно прыехала пазней.
• на наступны дзень пасля заканчэння камерцыйнай страхоўкі, калі яна была аформлена раней.

Кошт узносу — 13,5% ад мінімальнай заработнай платы, у 2025 годзе гэта было каля 2 808 чэшскіх крон у месяц. Узнос аплачваюць бацькі.

Як аформіць камерцыйную страхоўку?

1. Выберы правайдэра са спісу ліцэнзаваных кампаній.
2. Пераканайся, што поліс адпавядае патрабаванню 400 000 еўра на страхавы выпадак.
3. Праверы змест поліса, ён павінен уключаць прафілактыку, цяжарнасць, роды, стаматалогію..
4. Аформі поліс. Большасць кампаній працуюць анлайн. Для працягу ВНЖ поліс павінен пакрываць увесь запытаны перыяд.
5. Прадастаў поліс у Замежную паліцыю (Cizinecká policie) або праз анлайн-партал пры падачы дакументаў.
6. Сачы за датай заканчэння. Пры працягу ВНЖ разрыў у страхаванні нават на адзін дзень можа стаць фармальнай праблемай.