Страхоўка ў Літве

Літва — адзін з самых галоўных напрамкаў для міграцыі з Беларусі. Разбіраемся, як працуе страхавая сістэма, якія ёсць патрабаванні і як усё аформіць.

Як падаюцца дакументы: сістэма MIGRIS

Літва цалкам перавяла міграцыйныя працэдуры ў анлайн. Усе заявы на візы і ВНЖ падаюцца праз партал MIGRIS (migris.lt). Пры падачы заявы туды трэба загружаць лічбавую копію страхавога поліса, без гэтага сістэма проста не прапусціць заяву далей. Пераканайся, што ў цябе ёсць скан або PDF страхавога поліса ў добрай якасці яшчэ да пачатку запаўнення заявы.

Патрабаванні да страхоўкі: віза і ВНЖ

Патрабаванні адрозніваюцца ў залежнасці ад тыпу дакумента.

Для нацыянальнай візы (тып D):

мінімальнае пакрыццё — 30 000 еўра.
поліс павінен дзейнічаць на ўвесь перыяд візы.
абавязковае ўключэнне: экстранная медыцынская дапамога і рэпатрыяцыя.

Для часовага віда на жыхарства (TRP):

мінімальнае пакрыццё ад 6 000 да 10 000 еўра (у залежнасці ад падставы).
тэрмін дзеяння мінімум 1 год або ўвесь запытаны тэрмін ВНЖ.
Павінен уключаць экстранную дапамогу, рэпатрыяцыю, медыцынскі транспарт.
Поліс таксама павінен быць дзейсны на ўсёй тэрыторыі Шэнгенскай зоны.

Дзяржаўная сістэма PSD: каму даступная?

Дзяржаўнае абавязковае медыцынскае страхаванне ў Літве называецца PSD (Privalomasis sveikatos draudimas). На жаль, для большасці замежных студэнтаў з краін па-за ЕС яно недаступнае, у сістэму PSD уваходзяць толькі тыя, хто:

афіцыйна працаўладкаваны ў Літве.
мае часовы від на жыхарства і афіцыйна працаўладкаваны або вядзе індывідуальную дзейнасць.
мае пастаянны від на жыхарства.
мае статус бежанца (refugee status).
мае дадатковую абарону (subsidiary protection).

Студэнты з часовым ВНЖ пад гэтую катэгорыю не падпадаюць і павінны афармляць прыватную страхоўку.

Выключэнне: студэнты, якія з’яўляюцца грамадзянамі Літвы або маюць пастаянны ВНЖ, страхуюцца за кошт дзяржавы.

Самастойнае ўступленне ў PSD.

Калі ты маеш пастаянны ВНЖ, але не працуеш афіцыйна, то можаш плаціць узносы PSD самастойна. У 2026 годзе чаканы памер узносу 80,48 еўра ў месяц. Гэта дасць доступ да дзяржаўных клінік і многіх прыватных клінік на агульных падставах.

Прыватнае страхаванне: хто прапануе і колькі каштуе

Для студэнтаў і часова пражываючых замежнікаў прыватная страхоўка — гэта стандартны і даступны шлях. Асноўныя правайдэры прыватнага страхавання ў Літве:

Кошт поліса, які адпавядае патрабаванням для TRP, ад 50 да 150 еўра ў год, гэта значыць прыблізна 4–12 еўра ў месяц.

Як аформіць страхоўку?

Абяры правайдэра: BTA, Gjensidige або Ergo. Абавязкова праверце, што поліс пакрывае Шэнгенскую зону і ўключае рэпатрыяцыю.
Аформі поліс анлайн або ў офісе: укажы тэрмін, які адпавядае перыяду запытанага ВНЖ — мінімум 1 год.
Спампуй PDF-копію поліса, яна спатрэбіцца для загрузкі ў MIGRIS.
Зайдзі на партал MIGRIS і загрузі поліс пры падачы заявы на візу або ВНЖ.
Сачы за тэрмінам дзеяння і аднаўляй поліс да яго заканчэння, пры падаўжэнні ВНЖ патрэбна бесперапынная страхоўка.

Дадатак Infodesk

Агенцтва па прыёме і інтэграцыі распрацавала дадатак «InfoDesk App», каб дапамагчы замежнікам інтэгравацца ў Літве, ён змяшчае шмат карыснай інфармацыі, у тым ліку пра медыцынскае страхаванне, зручны ў выкарыстанні і адаптаваны для людзей з інваліднасцю, а таксама пад розныя моўныя і тэхнічныя патрэбы.